Голланд компанияси Ўзбекистонда 10 млн евролик инновацион қишлоқ хўжалиги кластери яратади
Тошкент. 9 ноябр. ЎзТАГ – Голландиянинг Lely компанияси Ўзбекистонда 10 млн евролик инновацион қишлоқ хўжалиги кластери яратишни режалаштирмоқда, деб хабар беради Ўзбек телеграф агентлиги (ЎзТАГ).
Республики Ташқи ишлар вазирлиги берган маълумотга кўра, 7-9-ноябр кунлари Нидерландиянинг таниқли Lely ва “ТСТ-Агро” фирмалари нуфузли делегацияси Ўзбекистонда бўлиб турибди. Улар Тошкентдаги Agro Expo Uzbekistan/Agrotech Expo қишлоқ хўжалиги кўргазмасида иштирок этишмоқда. 8 ноябрь куни делегация Ўзбекистон Қишлоқ хўжалиги вазирлиги ва Савдо-саноат палатасида музокаралар ўтказяпти, 9-ноябрь куни эса Наманган вилоятига боришади.
“(…)Lely Ўзбекистонга ташриф арафасида компания Қишлоқ хўжалигида Голландия технологиялари инновацион марказини ташкил этиш борасидаги режаларини эълон қилди. Тўлалигича ишлаб чиқариш Ўзбекистон ҳудудида маҳаллийлаштириладиган қишлоқ хўжалиги кластерини ташкил қилишни кўзда тутувчи мазкур марказ лойиҳасининг тахнимий қиймати 10 млн еврога тенг. Ерга ишлов бериш, чорвачиликни ривожлантириш, тайёр сут маҳсулотларини ишлаб чиқариш, чиқиндиларни қайта ишлаш ва қишлоқ хўжалиги маҳсулотларини сақлаш борасидаги Голландиянинг илғор технологияларини жорий этиш мўлжалланмоқда”, - дейилади Ўзбекистон ТИВ матбуот хизмати хабарида.
Ўзбекистон Республикасининг Бенилюкс давлатларидаги Элчихонаси хабар беришича, мазкур компаниялар Ўзбекистон бозорига киришни ва ишончли ҳамкорга айланишни режалаштирмоқда.
Шунингдек таълим компоненти ҳам кўзда тутилмоқда ва бунда Вагенинген университети олимлари ўзбек фермерларига замонавий Голландия технологияларини ўргатишади.
Бундан ташқари, ўзининг тупроқ остини суюқ органик ўғитловчи технологиялари билан машҳур бошқа бир Нидерлания компанияси – “ТCТ-Агро” билан ҳамкорлик алоқалари бўйича дастлабки келишувларга эришилди. Ҳозирда Ўзбекистон элчихонаси мамлакатимиз қишлоқ хўжалиги комплексида керакли бўлувчи аниқ сегментларни белгилаб олиш борасда мазкур компания билан музокаралар олиб бормоқда.
