“Ўзбекнефтегаз” делегацияси Абу-Дабида сунъий ақл имкониятлари билан танишди
Тошкент. 16 ноябр. ЎзТАГ – “Ўзбекнефтегаз” делегацияси Абу-Дабида сунъий ақл имкониятлари билан танишди, деб хабар беради Ўзбек телеграф агентлиги (ЎзТАГ).
“Жорий йилнинг 11-13 ноябр кунларида “Ўзбекнефтегаз” АЖ раиси вазифасини бажарувчи Б. Б. Ашрафханов бошчилигидаги делегация ишчи ташриф билан Абу-Даби (БАА) шахрида бўлди. Ўзбекнефтегаз” АЖ делегацияси Абу-Даби миллий нефть компаниясининг (ADNOC) ва Panorama Digital Centre компанияларининг бош офисларига ташриф буюрди. Ташриф мобайнида делегация аъзолари ахборот узатишнинг илғор технологиялари ва компаниянинг ишлаб чиқариш ва иқтисодий фаолиятидаги сунъий ақлнинг хайратомус имкониятлари билан танишдилар”, - дейилади ўзбек ширкати матбуот хизматининг хабарида.
Ташриф доирасида ADNOC компаниясининг Ижро бошқаруви директори – Омар Ал Сувайди ва ADNOC Offshore компанияси ижрочи директори Ахмад Ал Сувайдилар билан музокаралар бўлиб ўтди. Музокаралар якуни бўйича қатор ҳужжатлар имзоланди, жумладан, ADNOC компанияси билан газ маҳсулотини қидириш ва қазиб чиқариш (Upstream) ва қайта ишлаш (Downstream) йўналишлари бўйича стратегик тавсиялар бериш бўйича битим тузилди.
Бундан ташқари, “Ўзбекнефтегз” АЖ делегацияси Абу-Дабида ўтказилаётган Халқаро нефть саноати кўргазмаси ва конференциясида (ADIPEC 2018) иштирок этди.
Эслатиб ўтамиз, ушбу форум Яқин Шарқ ҳудудидаги энг муҳим тармоқ тадбирларидан биридир. Шу йили ушбу тадбирда нефть ва газ конларини қазиб чиқариш, нефтегаз ва кимё саноати маҳсулотларини қайта ишлаш, сақлаш ва етказиб беришдаги илғор технологияларни тақдим этган 2200дан ортиқ компаниялар иштирок этдилар.
Сурат манбаи: uzdaily.uz
