Бухоро вилоятида “Ғузор-Бухоро-Нукус-Бейнов” йўлининг реконструкция қилинган қисми фойдаланишга топширилди

Тошкент. 25 апрел. ЎзТАГ – Бухоро вилоятида А-380 “Ғузор-Бухоро-Нукус-Бейнов” йўлининг реконструкция қилинган 355-440 километри фойдаланишга топширилди, деб хабар беради Ўзбек телеграф агентлиги (ЎзТАГ).

Давлат автомобиль йўллари қўмитасидан маълум қилишларича, Давлат қабул комиссиясининг далолатномаси Ўзбекистон Республикаси Вазирлар Махкамаси томонидан тасдиқланди.

Объект Бухоро вилоятининг Ромитон, Жондор ва Пешку туманлари худудларидан Қизилқум чўлининг қумли пасттекисликлари бўйлаб ўтади. Қиймати $175,2 млнлик шартнома ўзбек томони ва “POSCO Engineering & Construction Co. Ltd.” (Корея Республика) ширкати томонидан тузилган.

Йўл участкасининг ишга туширилиши халқаро транзит ташувлари ҳажмини ошишини таъминлади. “Бухоро-Нукус-Бейнов” ва орт йўналиш бўйлаб юклар ва йўловчиларнинг хавфсиз ҳаракатланиши учун шароитлар яратилди. Йўлга кетадиган вақт деярли уч соатга қисқарди.

Шунингдек, автомагистрал ўз навбатида “Европа-Осиё” трансконтиненталь автомагистрали ва Ўзбек милллий автомагистрали кирувчи “Бейнов-Қўнғирот-Нукус-Бухоро-Самарқанд-Тошкент-Андижон” халқаро транспорт йўлагининг бир қисми саналади. Ўз навбатида, реконструкция қилинган участка Е-40 Европа йўлагининг ҳам бир бўлагидир.

Сурат манбаи: https://maxnau.livejournal.com/1335.html