Мирзиёев ва Бердимуҳамедов Тошкентдаги Махтумқули кўчасига ташриф буюрдилар
Тошкент. 24 апрел. ЎзТАГ – Ўзбекистон ва Туркманистон президентлари Шавкат Мирзиёев ва Гурбангули Бердимуҳамедовлар Тошкентдаги Махтумқули кўчасига ташриф буюрдилар, деб хабар беради давлат раҳбарининг матбуот хизмати.
“Маълумки, Президентимиз ташаббуси билан пойтахтимизнинг марказий кўчаларидан бирига буюк туркман шоирининг номи берилган эди. Бу ерда сўлим хиёбон барпо этилиб, атрофи янада обод қилинди. Кўча бошида Махтумқулига монумент ўрнатилди. Давлат раҳбарлари мазкур ёдгорлик пойига гуллар қўйди”, - дейилади хабарда.
Шавкат Мирзиёев монументнинг мазмун-моҳияти, бу ерда амалга оширилган ишлар ҳақида сўзлаб берди.
“Яхлит ансамблга айланган бу маскан Гурбангули Бердимуҳамедовда катта таассурот қолдирди. Туркман халқи, адабиёти ва маданиятига кўрсатган ҳурмати учун давлатимиз раҳбарига миннатдорлик билдирди”, - деб хулоса қилинади хабарда.
Сурат манбаи: https://www.uzreport.news/society/glavi-uzbekistana-i-turkmenistana-posetili-ulitsu-mahtumkuli
