Тошкент ва Боку икки томонлама муносабатларнинг шартномавий-ҳуқуқий базасини инвентаризация қилмоқда
Тошкент. 24 май. ЎзТАГ – 22-23 майда Боку шаҳрида Ўзбекистон Республикаси Ташқи ишлар вазирлиги делегацияси икки томонлама муносабатларнинг шартномавий-ҳуқуқий базасини инвентаризация қилиш ва такомиллаштириш бўйича навбатдаги Ўзбекистон-Озарбайжон маслаҳатлашувларида иштирок этди, деб хабар беради ўзбек ташқи сиёсий муассасасининг матбуот хизмати.
“Маслаҳатлашувларда Озарбайжон томонидан Ташқи ишлар вазирлиги Халқаро ҳуқуқ ва шартномалар бошқармаси бошлиғи ўринбосари Ризван Набиев раҳбарлигидаги делегацияси қатнашди. Музокаралар давомида кўриб чиқилаётган икки томонлама ҳужжатлар лойиҳалари юзасидан фикр алмашилди ва ҳамкорликнинг ҳуқуқий асосларини кенгайтириш истиқболлари муҳокама қилинди”, - дейилади хабарда.
Учрашувда мавжуд салоҳиятдан кенгроқ фойдаланиш ва транспорт ҳамда транзит соҳасидаги ҳамкорликни ривожлантириш, шунингдек, икки давлат автоташувчилари учун қулай шароитлар яратиш муҳимлигини инобатга олган ҳолда томонлар автомобилда ташувлар тўғрисидаги ҳукуматлараро битим тузишга тайёр эканликларини тасдиқладилар ва уни имзолаш масаласини бўлажак икки томонлама тадбирлар доирасида амалга оширишга келишдилар.
Сурат манбаи: https://ru.sputnik.az/politics/20180503/415156250/azerbajdzhan-ukraina-mid-otnoshenija.html
