Ўзбекистонликлар аксар ҳолларда қон айланиш тизими касалликларидан вафот этмоқда

Дата: 16:57, 15-10-2018.

Тошкент. 15 октябр. ЎзТАГ – 2018 йил январ-сентябрда Ўзбекистон 112,6 мингта ўлим қайд этилди, бундан 60,7% қон айланиш тизими касалликларидан, деб хабар беради Ўзбек телеграф агентлиги (ЎзТАГ).

“2018 йилнинг январ-сентябрида 112,6 мингта ўлим қайд этилган бўлиб, мос равишда 1000 аҳолига нисбатан ўлим коэффициенти 4,6 промиллени ташкил этди, 2017 йилнинг мос даврига нисбатан (4,8 промилле бўлган) 0,2 промиллега камайди”, - дейилади Ўзбекистон Давлат статистика қўмитаси хабарида.

Ҳужжатда қайд этилишича, вафот этганларнинг 60,7% – қон айланиш тизими касалликларидан, 9,5% – ўсимталардан, 6,3% – бахтсиз ҳодиса, заҳарланиш ва жароҳатланишлардан, 5,5% – овқат ҳазм қилиш аъзолари касалликларидан, 4,1% – нафас олиш аъзолари касалликларидан, 1,5% – юқумли ва паразитар касалликлардан ҳамда 12,4% – бошқа касалликлардан вафот этган.

Бундан ташқари, рўйхатга олинган 1 ёшгача вафот этган болалар сони 5,6 минг нафарни ташкил этиб, уларнинг 60,8% – перинатал даврда юзага келадиган ҳолатлардан, 16,6% – нафас олиш аъзолари касалликларидан, 11,7% – туғма аномалиялардан, 2,2% – бахтсиз ҳодиса, заҳарланиш ва жароҳатланишлардан, 2,2% – юқумли ва паразитар касалликлардан, 0,8% – овқат ҳазм қилиш аъзолари касалликларидан ва 5,7% – бошқа касалликлардан вафот этган.

Сурат манбаи: http://24.kz

Янгилик билан ўртоқлашиш: