GM Uzbekistan Мустақиллик куни га янги моделнинг тақдим этилиши ҳақидаги хабарларни рад этди

Тошкент. 20 июл. ЎзТАГ – 19 июлда GM Uzbekistan компанияси баъзи ОАВ томонидан тарқатилаётган 1 сентябр - Ўзбекистон мустақиллигининг 26 йиллик байрамига янги русумдаги автомобил тақдим этилиши ҳақидаги хабарларга раддия берди, деб хабар беради Ўзбек телеграф агентлиги (ЎзТАГ).

“GM Uzbekistan АЖ ушбу хабарлар ҳақиқатга тўғри келмайди ва жорий йилнинг 5 июль куни босма ҳамда электрон ОАВ ходимлари учун ташкил этилган матбуот-тури давомида тақдим этилган маълумотнинг бузиб талқин қилинишидир”, - дейилади раддияда.

“Кўрсатилган тадбир давомида компания раҳбарияти томонидан модель қаторини янгилаш доирасида янги автомобиль моделларини ўзлаштириш масаласи ўрганилаётгани маълум қилинганди. Шу билан бирга, бундай лойиҳаларни амалга ошириш бўйича аниқ муддатларга маркетинг ўрганишлари, техник-иқтисодий асосларнинг ишлаб чиқилиши ва кўрсатилган тартибда бошқа параметрларни мувофиқлаштириш якунланганидан сўнг аниқлик киритилиши таъкидлаб ўтилди”, - дейилади ширкат хабарида. 

GM Uzbekistan ОАВ вакиллари билан очиқ ва конструктив мулоқотга тайёр эканини маълум қилгани ҳолда, шу билан бирга, журналистик этика меъёрларига амал қилиш ва янгиликлар ҳамда таҳлилий материалларни тайёрлашда расмий ҳамда объектив маълумотдан фойдаланишни сўраймиз.

“Фикримизча, бундай ёндашув бизнинг соҳада рўй бераётган жараёнларни ёритишда бузиб талқин этилган маълумотлар тарқалишининг олдини олиш имконини беради”, - деб ҳисоблайди компания.