Тошкентда автобуслар ҳаракатини кузатиш бўйича янги телефон иловаси ишга туширилди

Тошкент. 4 август. ЎзТАГ – “Тошшаҳартрансхизмат” компанияси Тошкентдаги автобуслар ҳаракатини кузатишга имкон берувчи TashBus мобиль иловасини ишга туширди, деб хабар беради Ўзбек телеграф агентлиги (ЎзТАГ).

Маълум қилинишича, илова Grand Technology System компанияси билан ҳамкорликда ишлаб чиқилган бўлиб, Android операцион тизимидаги барча телефонларда ишлайди.

“TashBus” иловаси ёрдамида фойдаланувчи белгиланган йўналишдаги автобус ҳаракатини кузатиши, унинг керакли бекатга келиш вақтини ва ушбу бекатдан қайси автобуслар ўтишини билиб олиши, яқиндаги автобусларнинг фойдаланувчи турган автобекатгача бўлган масофасини аниқлаши мумкин”, - деб аниқлаштиришди “Тошшаҳартрансхизмат”да.

Шунингдек, ширкатда яқин орада илованинг iOS талқини ва веб-версиясини ҳам ишга туширилишини таъкидлашди.