ТТДҲК саммитида Ўзбекистон президенти бир қатор таклифлар билан чиқди
Тошкент. 16 октябрь. ЎзТАГ – 15 октябрь куни Бакуда (Озарбайжон) Туркий тилли давлатлар ҳамкорлик кенгаши (Туркий кенгаш, ТТДҲК) 7-саммитида Ўзбекистон президенти Шавкат Мирзиёев бир қатор таклифлар билан чиқди, дея хабар беради Ўзбек телеграф агентлиги (ЎзТАГ).
Ўзбекистон раҳбари матбуот хизматининг хабар беришича, йиғилишда ташкилотга аъзо давлатлар раҳбарлари – Озарбайжон президенти Илҳом Алиев, Туркия президенти Режеп Таййип Эрдоған, Қирғизистон президенти Сооронбай Жээнбеков, Қозоғистоннинг биринчи президенти Нурсултон Назарбоев иштирок этди.
"Барча иштирокчи мамлакатлар Ўзбекистоннинг Туркий кенгашдаги чиқишини мамнуният билан қабул қилдилар. Расмий шахслар ва экспертлар ўзбек халқининг туркий халқлар тақдиридаги тарихий ўрни, Ўзбекистоннинг ташкилот учун улкан салоҳияти ва аҳамиятини бир овоздан таъкидладилар", - дейилади хабарда.
Саммитда Ш.Мирзиёев ўз чиқишида Туркий кенгашга аъзо мамлакатлари ўртасида савдо ва иқтисодий алоқаларни ривожлантириш муҳимлигини таъкидлаб, Ўзбекистоннинг иқтисодий соҳадаги ютуқлари ҳақида сўзлаб берди.
"Ўзбекистон президенти қўшма технопарклар, инновацион стартап-компаниялар ва венчур жамғармалар, қўшма инвестиция фонди ташкил этишни, туркий тилли мамлакатлар савдо уйларини очишни, Туркий кенгаш доирасида ёш тадбиркорлар форумини ташкил этишни ва унинг биринчи мажлисини 2020 йилда Ўзбекистонда ўтказишни, кенгашнинг ҳар бир мамлакатининг она тилида халқлар адабиётининг энг яхши намуналарини ўз ичига олган "Туркий адабиёт хазинаси" туркум китобларини нашр этишни таклиф қилди", - дейилади хабарда.
ҚирТАГ маълумотларига кўра, саммит якунлари бўйича Туркий тилли давлатлар ҳамкорлик органларининг Мувофиқлаштирувчи қўмитасини ташкил этиш, Турк дунёсининг олий ордени тўғрисидаги қарор, Н.Назарбоевга "Туркий тилли давлатлар ҳамкорлик кенгашининг бир умрлик шарафли раиси" ва Турк дунёсининг олий орденини бериш тўғрисида қарор қабул қилинди, Турк кенгаши бош котибининг ўринбосари ва Турк маданияти ва мероси жамғармаси президентини тайинлаш тўғрисида қарор қабул қилинди.
Бундан ташқари, ЎзбекистонниТТДҲК таркибига қабул қилиш тўғрисидаги қўшма баёнот, шунингдек, ТТДҲК котибияти ва Венгрия ҳукумати ўртасида Венгрияда ТТДҲК ваколатхонасига оид битим имзоланди.
Эслатиб ўтамиз, Туркий тилли давлатлар ҳамкорлик кенгаши (Туркий кенгаш, ТТДҲК) замонавий туркий давлатларни бирлаштирган халқаро ташкилот бўлиб, унинг асосий мақсади аъзо давлатлар ўртасида ҳар томонлама ҳамкорликни ривожлантиришдан иборат. Ташкилот 2009 йил 3 октябрда Озарбайжоннинг Нахчивон шаҳрида ташкил этилган бўлиб, унинг биринчи аъзолари Туркия, Озарбайжон, Қозоғистон ва Қирғизистон бўлган.
Сурат манбаи: president.uz
