Ўзбекистон Миллий телерадиокомпанияси Рио Олимпиадасини трансляция қилади

Тошкент. 4 август. ЎзТАГ – Ўзбекистон Миллий телерадиокомпанияси Рио-де-Жанейро Олимпиадасини трансляция қилиш ҳуқуқини олди, деб хабар беради UZ24 МТРК матбуот релизига асосланган ҳолда.

“Ўйинларнинг очилиш ва ёпилиш маросимини, спортчилар мусобақалари, жумладан, ўзбек олимпиачиларининг чиқишларини Sport телеканали трансляция қилади”, дейилади мақолада.

Ўзбекистон олимпиа термаси делегацияси таркибида Sport канали мухбири ҳам Бразилияга жўнаб кетган бўлиб, у Олимпиа қишлоғи ҳаёти, спортчиларнинг яшаш шароити ва кайфиятлари ҳақида ҳикоя қилиб беради.

Олдин хабар берилгани каби, 1 августда Ўзбекистон олимпиа термаси Рио-де-Жанейрога жўнаб кетди. Олимпиа қишлоғида ўзбек байроғи кўтарилди.

Эслатиб ўтамизки, ўзбек спортчилари Риодаги ўйинларга 120 ортиқ лицензияларни қўлга киритишган. Булардан 70 йўлланма олимпиачиларга тегишли бўлса, 52 йўлланма паралимпиачилар томонидан қўлга киритилган. Улар спортнинг академик эшкак эшиш, бадиий гимнастика, байдарка ва каноэда эшкак эшиш, бокс, дзюдо, енгил ва оғир атлетика, спорт гимнастикаси, стол тенниси, сузиш, таэквондо (WTF), теннис, трамполин, ўқ отиш, эркин ва юнон-рум кураши каби турларида иштирок этадилар.

Маълумот ўрнида, XXXI Олимпия ўйинлари 5-21 август кунлари Рио-де-Жанейрода, XV Паралимпия ўйинлари эса 7-18 сентябрда бўлиб ўтади.