Ўзбекистонда журналистларни президент сайловларига аккредитация қилиш шартлари маълум қилинди
Тошкент. 15 сентябр. ЎзТАГ – Ўзбекистонда журналистларни президент сайловларига аккредитация қилиш шартлари маълум қилинди, деб хабар беради Ўзбек телеграф агентлиги (ЎзТАГ).
“Журналистлар аккредитациядан ўтиши учун жорий йилнинг 1 декабрига қадар Ўзбекистон Республикаси Президенти сайловини ёритиш бўйича Республика матбуот марказига қуйидаги ҳужжатларни тақдим қилишлари лозим: Ўзбекистон Республикаси Марказий сайлов комиссияси раиси М.Абдусаломов номига ОАВ ташкилотининг расмий бланкасида журналистни аккредитациядан ўтказиш тўғрисидаги ариза; аккредитациядан ўтадиган журналистнинг ўлчами 3,5х4,5 см бўлган икки дона фотосурати; ОАВ ташкилотининг давлат рўйхатидан ўтганлиги тўғрисидаги гувоҳнома нусхаси, электрон ОАВ учун – эфирга узатиш лицензиясининг нусхаси, хорижий журналистлар учун – Ўзбекистон Республикаси Ташқи ишлар вазирлигида аккредитациядан ўтганлиги ҳақидаги ҳужжатнинг нусхаси”, - дейилади Ўзбекистон Республикаси Давлат порталида жойлаштирилган хабарда.
Таъкидланишича, кўрсатилган маълумотлардан иборат бўлмаган ёки журналистнинг уларга илова қилинмаган фотосуратларисиз ариза кўриб чиқиш учун қабул қилинмайди.
