“Қишлоқ қурилиш банк” кичик бизнесга 154,9 млрд сўмлик кредитлар берди

Тошкент. 24 май. ЎзТАГ – “Қишлоқ қурилиш банк” АТБ кичик бизнес субъектлари учун банкнинг ўз маблағлари ҳисобидан ажратилган кредитлар ўтган йилнинг шу даврига нисбатан 154,9 млрд сўмга ортиб, 2017 йилнинг 19 май ҳолатига 424,3 млрд сўмни ташкил этди, деб хабар беради Ўзбек телеграф агентлиги (ЎзТАГ).

Хусусан, ҳисобот даврида қишлоқ жойларда намунали уйлар қуришга 158 млрд сўм кредитлар ажратилди.

Ҳудудларни комплекс ривожлантириш дастури доирасида “Қишлоқ қурилиш банк” АТБ филиаллари томонидан 22 майгача 211 лойиҳани молиялаштириш режалаштирилган. Амалда 262 та лойиҳага 45,9 млрд сўм миқдорида банк кредитлари ажратилди ва бунинг натижасида 1541 та янги иш ўринлари яратилди.

Йил бошидан буён банк ходимлари томонидан 422 339 та хонадонга бориб аҳоли билан суҳбатлар ўтказилди. Натижада 36 288 та фуқаро томонидан банкдан кредит олиш истаги билдирилган. Бугунги кунга келиб, кредит олиш истагини билдирган фуқароларнинг 30 288 тасига 213,6 млрд сўмлик кредитлар ажратилиши таъминланди.  

Коллеж битирувчиларининг бизнес лойиҳаларини қўллаб қувватлашга 11 млрд сўмлик микро-кредитлар, аёллар бошқараётган субъектларга 97,8 млрд сўм ажратилди. Янгидан ташкил этилган тадбиркорлар, оилавий корхоналар, касаначиларга 87,8 млрд сўм берилди.