“Ўзагромашсервис” хизматлар соҳаси ўсиш кўрсаткичлари бўйича ўтган йилги натижалардан олдинда бормоқда

Тошкент. 13 октябр. ЎзТАГ – 2015 йилнинг 9 ойида “Ўзагромашсервис” уюшмаси корхоналари 102 млрд сўмлик хизматлар кўрсатдилар. Ўтган бутун 2014 йилда эса бу кўрсаткич 134 млрд сўмни ташкил қилган эди, деб хабар беради Ўзбек телеграф агентлиги (ЎзТАГ).

Уюшмадан маълум қилишларича, унга қишлоқ хўжалиги техникаларини эҳтиёт қисмлар, моддий-техник ресурслар, таъмир ва сервис хизмати билан таъминлаш юклатилган.

Бугун уюшма тизимига 13 ҳудудий машина-трактор бирлашмалари, 174 туман машина-трактор парки, 12 таъминот корхонаси, 14 қишлоқ хўжалиги техникаларини таъмирлаш заводи, 3 автотранспорт корхонаси, 5 техник хизмат корхонаси ва 3 қўшма корхона киради.

Уларда жами 3 минг киши ишлайди.

Бугунда машина-трактор паркларининг қишлоқ хўжалиги техникалари ёрдамида мамлакатдаги 35% майдонлар ишланиб, 55,5% ҳосил ўриб олинмоқда.

2015 йилда қишлоқ хўжалиги техникалари ва дон йиғиш комбайнларини мавсумга тайёрлаш учун жойларга 55 млрд сўмлик эҳтиёт қисмлар ва техник ресурлар етказилди. Терим мавсумида уюшманинг 3435 комбайни қатнашиб, 7785 тракторни кузги ишларга жал этиш режалаштирилган.

$1=2649,22 сўм