“Ўзбекенгилсаноат” энг яхши логотип учун конкурс эълон қилди

Тошкент. 12 июл. ЎзТАГ – “Ўзбекенгилсаноат” Акционерлик компанияси ўз логотипини яратиш учун конкурс эълон қилди, деб хабар беради Ўзбек телеграф агентлиги (ЎзТАГ).

Ширкат маълумотларига кўра, бундан кўзланган мақсад – маҳаллий ишлаб чиқарувчиларни қўллаб қувватлашдир. Дизайн-лойиҳалар 18 июлгача қабул қилинади. Якунлар 21 июлда сарҳисоб қилинади. Ғолиб “Ўзбекенгилсаноат”дан соврин олади.

 Логотип деганда “Ўзбекенгилсаноат”нинг оригинал эмблемаси (фирма белгиси) ва ширкатнинг тўлиқ ёки қисқартирилган номланиши назарда тутилмоқда.

Логотипда акс этган ғоялар “Ўзбекенгилсаноат” учун ижобий имиж яратиб, миллий ўзига хослик ва орнамент; тармоқнинг илғор характери; технологиклиги ва ширкатнинг асос ғоясини ҳисобга олиши зарур”, - деб таъкидланади компания хабарида.

Логотип реклама-ахборот материалларида “Ўзбекенгилсаноат”нинг расмий логотипи деб қабул қилинади. Конкурсда истаган барча қатнашиши мумкин. Бир киши тақдим этиши мумкин бўлган логотиплар лойиҳалари сони чекланмаган.