“Ўзбекинвест” Прага суғуртачилар клубида тақдим қилинди
Тошкент. 26 май. ЎзТАГ – “Ўзбекинвест” экспорт-импорт миллий суғурта компанияси Прага суғуртачилар клуби йиғилишида иштирок этди, деб хабар беради Ўзбек телеграф агентлиги (ЎзТАГ).
Компаниядан хабар беришларича, Полша Республикаси экспорт-кредит агентлиги (КUКE) томонидан ташкил этилган Шарқий ва Марказий Европа инвестиция ва кредитлар суғурталовчиларининг Берн иттифоқи Прага клубининг навбатдаги йиллик йиғилиши Варшава шаҳрида бўлиб ўтди.
Унда 61 мамлакатдан 76та экспорт-кредит агентликларининг 200дан ортиқ вакиллар, жумладан, “Ўзбекинвест” вакиллари ҳам қатнашдилар.
Йиғилишда “Ўзбекинвест” компанияси ривожланишининг асосий жиҳатлари бўйича тақдимот намойиш этилиб, суғурталаш ва қайта суғурталаш соҳасида ҳамкорлик истиқболларини муҳокама қилиш ва бизнес мулоқот ўрнатиш мақсадида экспорт-кредит агентликлари вакиллари билан учрашувлар ташкил этилди.
Эслатиб ўтамизки, “Ўзбекинвест” компанияси кўп йиллардан бери Халқаро экспорт кредитлари ва инвестициялар суғуртачилари Прага клубининг (Берн Иттифоқи) тўла ҳуқуқли аъзосидир. Унинг доирасида ширкат 20 ортиқ хорижий мамлакатларнинг давлат экспорт-кредит агентликлари билан ҳамкорликни йўлга қўйди ва ривожлантириб бормоқда.
