“Ўзбеккино” “PROlogue” кинофестивалида қатнашиш учун аризаларни қабул қилмоқда

Тошкент. 16 октябр. ЎзТАГ – “Ўзбеккино” Миллий агентлиги “PROlogue” қисқа метражли фильмлар кинофестивалида қатнашиш учун аризаларни қабул қилмоқда, деб хабар беради Ўзбек телеграф агентлиги (ЎзТАГ).

Агентликдан маълум қилишларича, саралаш босқичи 31 октябргача ўтказилади, фестивалнинг ўзи эса 16-21 ноябр кунлари бўлиб ўтади.

Конкурс дастури шартларига кўра, фестивалда Ўзбекистон Республикасининг фуқароси бўлган 35 ёшгача бўлган кинорежиссёрлар қатнашишлари мумкин. Тақдим этиладиган фильмлар эса кейинги икки йил ичида олинган бўлиб, узунлиги 40 дақиқадан ошмаслиги зарур.

Ташкилий қўмита томонидан энг яхши қисқа метражли фильм, сценарий, режиссёрлик ва операторлик иши учун совринлар кўзда тутилган. Шунингдек, болалар фильмлари учун ҳам мукофотлар берилади.

Маълумот ўрнида, "PROlogue” қисқа метражли фильм республика кинофестивали ёш истеъдодлар, кинорежиссёрларни қўллаб-қувватлашга йўналтирилган. Тадбир “2015 йилда Ўзбекистон Республикасида давлат ёшлар сиёсатини амалга оширишга йўналтирилган қўшимча чора-тадбирлар дастури”га мувофиқ ўтказилмоқда.