“Ўзбекнефтегаз” АЖ ва Mitsubishi Corporation ҳамкорликни ривожлантиришни муҳокама қилдилар

Тошкент. 27 сентябр. ЎзТАГ – Тошкентда “Ўзбекнефтгаз” АЖ Бошқарув раиси вазифасини бажарувчи Баҳром Ашрафханов ва Mitsubishi Corporation бош вице-президенти, компаниянинг минтақавий ижрочи директори ўринбосари Казуо Инада билан учрашуви бўлиб ўтди, деб хабар беради Ўзбек телеграф агентлиги (ЎзТАГ).

“Ўзбекнефтегаз” АЖ матбуот хизматидан маълум қилишларича, Б. Ашрафханов учрашувда Mitsubishi Corporation томонидан ишлаб чиқарилган компрессор ускуналар Шўртан Газкимё комплексида 20 йилга яқин муваффақият билан фойдаланиб келинаётганини таъкидлади. Шунингдек, у GTL лойиҳаси доирасида компрессор ускуналарини етказиб бериш масаласи ўрганиб чиқилганини қўшимча қилди.

Ўзбекнефтгаз АЖ Япониялик ҳамкорларни Boston Consulting Group билан биргаликда 2030 йилгача нефт ва газ саноатини ривожлантириш Концепциясини ишлаб чиқиш бўйича олиб борилаётган ишлар билан таништирди. Мазкур концепциянинг устувор йўналишларидан бири табиий газни чуқур қайта ишлаш бўйича инвестицион лойиҳаларни амалга оширишдир.

Ўз навбатида, япониялик меҳмон компания “Ўзбекнефтгаз” АЖ томонидан амалга оширилаётган лойиҳаларда иштирок этишга қизиқиш билдираётганини айтиб ўтган.

Казуо Инада инвестицион лойиҳаларни молиялаштириш учун Япония халқаро ҳамкорлик банки (JBIC) ва Япония халқаро ҳамкорлик агентлиги (JICA) маблағларини жалб қилиш имкониятлари билан ҳам таништирди.

Учрашув якунида томонлар нефт ва газ соҳасидаги ҳамкорликка оид аниқ таклифларни ишлаб чиқиш бўйича биргаликдаги ишчи гуруҳ тузиш тўғрисида келишиб олдилар.

Сурат манбаи: из https://www.uzdaily.uz