“Ўзбекнефтегаз”нинг лойиҳа институти чораклик соф фойда миқдорини 50% кўпайтирди

Тошкент. 7 май. ЎзТАГ – 2015 йилнинг биринчи чорагида “Ўзбекнефтегаз” миллий холдинг компанияси қошидаги “O’ZLITINEFTGAZ” акционерлик жамияти чорак якунлари бўйича 4,26 млрд сўм соф фойда олди, бу ўтган йилнинг муқобил давридагидан 50% ошиқдир, деб хабар беради Ўзбек телеграф агентлиги (ЎзТАГ).

Ўзбекистон Хусусийлаштириш қўмитаси қошидаги Қимматли қоғозлар бозорини мувофиқлаштириш ва ривожлантириш маркази томонидан эълон қилинган молия ҳисоботига кўра, лойиҳа институтининг соф тушуми 9,62 млрд сўмни (+24,7%), маҳсулот сотишдан олган ялпи фойдаси 7,5 млрд сўмни (+39,1%) ташкил этган.

Ўз навбатида, тақсимланмаган фойда 25,22% ўсиб, 21,15 млрд сўмни ташкил қилган. Компания активлари миқдори 12,65% кўпайиб, 31,65 млрд сўмга етган.

“O’ZLITINEFTGAZ” акционерлик жамияти Ўзбекистон нефть ва газ саноатиниг тармоқ тадқиқот ва лойиҳа институтидир. Институт томонидан ишлаб чиқилган дастурларнинг тасдиқланган иқтисодий самараси 10 млрд сўмга баҳоланмоқда.

$1 = 2517,8 сўм