“Ўзбектелеком” ҳудудларда FTTB технологияси бўйича уланишни кенгайтирмоқда

Тошкент. 29 январ. ЎзТАГ – “Ўзбектелеком” акционерлик компанияси UZONLINE абонентларини Ўзбекистоннинг вилоят марказларида FTTB технологияси бўйича улашни кенгайтирмоқда, дея хабар беради Ўзбек телеграф агентлиги (ЎзТАГ).

Компаниядан хабар қилишларича, Андижон, Бухоро, Жиззах ва Нукусда 100дан ошиқ янги кўпхонадонли уйлар FTTB технологияси бўйича тармоққа уланган.

Яқин орада Ўзбекистоннинг бошқа вилоятларида UZONLINE хизматларига FTTB технологияси бўйича уланган уйларнинг манзиллари ҳам эълон қилинади.

Мутахассисларнинг маълумотларига кўра, FTTB технологияси уйларга оптик кабель тортиб, уни хонадонларга улаш йўли билан жорий этилади. Натижада, ҳар бир хонадон интернет тармоғига юқори тезликда уланади.

Бугунда FTTB технологияси энг истиқболли технологиялардан бири ҳисобланади. Чунки у зарур жойларда тармоқ сиғимини тезликда ошириш ва юқори сифатли маълумотлар узатиш хизматлари кўрсатишга имкон беради.