“Ўзбектелеком” юридик шахслар учун тезкор интернет тарифларини пасайтиришни режалаштирмоқда

Тошкент. 27 апрел. ЎзТАГ – 2015 йил 1 майдан бошлаб “Ўзбектелеком” акционерлик компанияси юридик шахслар учун тезкор интернет тарифларини пасайтиришни режалаштирмоқда, дея хабар беради Ўзбек телеграф агентлиги (ЎзТАГ).

“Гап корпоратив мижозлар учун “Business Unlimited” тарифлари серияси ҳақида кетмоқда. Ушбу тарифларнинг барчасида ойлик абонент тўлови миқдори пасайтирилади. Тариф ҳажми ва интернет тезлигидан келиб чиқиб тарифлар 20 мингдан 320 минг сўмгача туширилади”, - деб таъкидлашди компания матбуот хизматида.

Маълумот ўрнида, “Ўзбектелеком”нинг кенг полосали тезкор интернет хизматлари Uzonline савдо белгиси остида кўрсатилади. Сўнгги маълумотларга кўра йўналиш мижозларининг сони 600 мингдан ошиқ. Корпоратив интернет-мижозлар сони эса эълон қилинган эмас.

“Ўзбектелеком” АК – бутун Ўзбекистон бўйича ишловчи энг йирик телекоммуникация операторидир. Компания таркибида 22 филиал, 14 ҳудудий, 8 ихтисослашган ва 3 шўъба корхоналари мавжуд.