“Ўзсаноатқурилишбанк” Annexure Financial Solutions билан инвесторларни биргаликда жалб қилиш ҳақида келишиб олди

Тошкент. 23 май. ЎзТАГ – “Ўзсаноатқурилишбанк” акционерлик-тижорат банки ва Annexure Financial Solutions компанияси билан қиймати $100 млнга тенг меморандум имзолади, деб хабар беради Ўзбек телеграф агентлиги (ЎзТАГ).

Банк матбуот хизматидан маълум қилишларича, ҳужжат тўғридан-тўғри хорижий инвестицияларни ва хорижий капитални жалб қилиш, инвесторлар ўртасида Ўзбекистон Республикасида амалга оширилаётган инвестицион лойиҳаларни илгари суриш мақсадида имзоланган.

Annexure Financial Solutions компанияси Тошкент ва дунёнинг энг йирик бизнес мегаполисларидан бири ва салоҳиятли инвестор ҳамда товар ва хизматлар ишлаб чиқарувчилари энг кўп жам бўлган Шанхайда (Хитой) бизнес ва инвестиция форумлари ўтказади.

Ҳамкорлик манфаатдор стратегик инвесторларни топиш ва умумий қиймати $100 млнгача бўлган хорижий сармояларни жалб қилишга имкон беради. Бу эса ўз навбатида тадбиркорлик субъектларининг тўғридан-тўғри хорижий инвестицияларни жалб қилишга бўлган қизиқишини ошишига туртки бўлади.

Эслатиб ўтамизки, Annexure Financial Solutions консалтинг компаниясининг бош офиси Гонконгда жойлашган, Шанхай ва Тошкент шаҳарларида ваколатхоналарига эга. Компания дунё миқёсида эътироф этилган инвестицион компанияларга ҳамкорлар, инвесторлар ва мижозлар билан алоқа ўрнатиш, кўришиш ва алоқаларни мустаҳкамлашга кўмаклашади.

Жорий йилнинг бошида Тошкент шаҳрида ваколатхонасини очган компания кичик бизнес субъектлари, давлат идораларига стратегик консалтинг, корпоратив консалтинг ва қимматли қоғозлар бозорини таҳлил этиш бўйича хизматларини таклиф қилиб келмоқда.

Сурат манбаи: https://www.uzdaily.uz/articles-id-37589.htm