“Ўзсаноатқурилишбанк” хитойнинг ICBC банки билан келишув имзолади

Тошкент. 8 июн. ЎзТАГ – “Ўзсаноатқурилишбанк” АТБ Хитой Саноат-тижорат банки (ICBC) билан келишув имзолади, деб хабар беради Ўзбек телеграф агентлиги (ЎзТАГ).

Молия муассасидан маълум қилишларича, ҳужжат 9-10 июн кунлари Шанхай Ҳамкорлик Ташкилотининг Хитой Халқ Республикасида бўлиб ўтадиган Саммити арафасида имзоланди.

Ушбу ҳадли битим Ўзбекистон Республикаси тадбиркорлик субъектларининг хитойлик ишлаб чиқарувчилар билан савдо алоқаларини мустаҳкамлаш, уларнинг янги иш ўринларини яратиш бўйича саъй-ҳаракатларини қўллаб-қувватлаш ҳамда Хитой Халқ Республикасидан юқори технологик ускуналар, товарлар ва хизматлар импортини молиялаштиришга хизмат қилади.

Эслатиб ўтамизки, “Ўзсаноатқурилишбанк” АТБ иқтисодиётнинг базавий тармоқлари корхоналари ҳамда кичик бизнес субъектлари инвестиция лойиҳаларини молиялаштириш мақсадида Хитой Тараққиёт Банки ва Хитой Эксимбанки сингари етакчи молия институтларининг кредит линияларини жалб қилиб келмоқда.

Шу билан бирга “Ўзсаноатқурилишбанк” АТБ мамлакат тижорат банклари орасида биринчилардан бўлиб Хитой Банки (Bank of China) билан ҳамкорлик алоқаларини ўрнатди.

Forbes Global 2000 рўйхатига кўра, 2017 йил якунлари бўйича Хитой Саноат-савдо банки $3,5 трлн миқдоридаги активлари билан дунёнинг энг йирик банки сифатида эътироф этилган.

Сурат манбаи: http://bigrussia.org/post/read/2273