“Ўзтемирйўловчи” компанияси чипталарга чегирмалар жорий қилди

Тошкент. 25 январ. ЎзТАГ – “Ўзтемирйўловчи” акциядорлик жамияти январ ойидан бошлаб халқаро йўналишларда қатнайдиган йўловчи поездларига чипталарнинг олдиндан харид қилиш муддатига қараб чегирмалар жорий қилди, деб хабар беради Ўзбек телеграф агентлиги (ЎзТАГ).

“Йўловчи купе ва махсус вагонлар учун чиптани поезднинг жўнаш кунидан 45-31 кун олдин харид қилса, 45% чегирмага эга бўлади, купе ва махсус вагонлар учун чиптани поезднинг жўнаш кунидан 30-6 кун олдин харид қилса, 35% чегирма олади”, - дейилади ширкат матбуот хизматининг хабарида.

“Шунингдек, йўловчи плацкарт вагонлар учун чиптани поезднинг жўнаш кунидан 45-31 кун олдин харид қилса, 35% чегирма тақдим этилади. Плацкарт вагонлар учун чиптани поезднинг жўнаш кунидан 30-6 кун олдин харид қилган йўловчилар 35% чегирмага эга бўладилар. Чиптани поезднинг жўнаш кунидан 5 кун олдин ва ундан камроқ вақт қолганда харид қилган йўловчига эса, 5% устама қўшилиши белгиланган”, - деб таъкидланади хабарда.

Мазкур чегирмалар ички йўналишлар, шунингдек, гуруҳ бўлиб йўлга чиққан йўловчиларга нисбатан татбиқ этилмайди.

Сурат манбаи: https://pravo.ru/review/view/145185/