1 июлдан Тошкентда “Хавфсиз пойтахт” концепцияси жорий этилмоқда

Тошкент. 20 июн. ЎзТАГ – 1 июлдан Тошкентда “Хавфсиз пойтахт” концепцияси жорий этилмоқда, деб хабар беради Ўзбек телеграф агентлиги (ЎзТАГ).

Бу Ўзбекистон Республикаси Президентининг “Тошкент шаҳрида жамоат тартибини таъминлаш, ҳуқуқбузарликлар профилактикаси ва жиноятчиликка қарши курашиш самарадорлигини ошириш бўйича қўшимча чора-тадбирлар тўғрисида”ги 19 июндаги қарори билан кўзда тутилган.

Концепциянинг амалга оширилиши соат 16:00 дан 8:00га қадар вақт оралиғида ички ишлар органлари, Миллий гвардия саф бўлинмалари жамоат тартибини таъминлаш кучларининг камида 70 фоизини, шунингдек, жамоатчилик вакилларини (кейинги ўринларда – жамоат тартибини таъминлаш кучлари) жалб қилиш орқали куну тун уч сменали патруль режимини ташкил этишни кўзда тутади.

Шунингдек, ички ишлар ва прокуратура органларининг профилактика, тезкор ва тергов бўлинмалари, маъмурий судлар, адвокатура, шунингдек, суд-тиббий экспертиза хизматлари ходимлари томонидан сутканинг кечки ва тунги вақтида хизмат фаолиятини тўлиқ амалга ошириш, кейинчалик сутканинг кундузги вақтида ўн олти соат давомида уларни бевосита хизмат вазифаларини бажаришдан озод этиш режалаштирилмоқда.

Бундан ташқари, қарор ички ишлар органлари бўлинмалари, биринчи навбатда, жамоат тартибини таъминлаш кучларининг патруль гуруҳлари ҳодиса содир бўлган ёки сигнал берилган жойга максимал тезкорлик билан етиб боришини таъминлашни кўзда тутади.

Қарор билан пойтахтда тартиб-интизомни таъкинлаш бўйича бошқа чораларни ҳам кўзда тутади.

Сурат манбаи: http://uz.utro.news/today/2/2018/5/11/