10 ойда ўзбек автомобилларининг россия бозоридаги сотувлари деярли ярмига қисқарди

Тошкент. 13 ноябр. ЎзТАГ – Европа бизнеси уюшмасининг Автомобиль ишлаб чиқарувчилар қўмитаси маълумотларига кўра, 2015 йил январ-октябрда Россияда GM Uzbekistan ҚК томонидан ишлаб чиқарилган 17119 автомобиль сотилган. Бу 2014 йилнинг муқобил давридагига қараганда 48,9% (33472) оздир, деб хабар беради Ўзбек телеграф агентлиги (ЎзТАГ).

Хусусан, октябрда Россияда GM Uzbekistanнинг 1621та автомобили сотилган ва бу 2014 йилнинг октябридагига (1819) нисбатан 10,9% камдир.

Октябрда GM Uzbekistanнинг россия бозоридаги сотувлари улуши ўтган йилнинг шу ойидаги 0,9% нисбатан 1,2% ёки 0,3 фоиз пунктига кўпайди, лекин 10 ой ҳисобида 1,7%дан 1,3%гача камайди.

Умуман олганда, октябрда Россияда янги енгил ва енгил тижорат автомобиллари сотуви йил ҳисобида 38,5%, яъни 129,95 мингта автомобилгача қисқарди. Энг кўп сотилган автомобиллар ўнталигига Россияда ишлаб чиқарилган автомобиллар кирди. Январ-октябрда РФ жами қарийб 1,323 млн енгил автомобиль сотилган.