2014 йил якунлари бўйича “Ўзгеобурнефтегаз” компанияси соф фойдасини 16,5% кўпайтирди

Тошкент. 3 июл. ЎзТАГ – 2014 йил якунлари бўйича “Ўзгеобурнефтегаз” АЖ соф фойдаси 2,64 млрд сўмни ташкил қилиб, 2013 йилнинг муқобил давридагига қараганда (2,26 млрд сўм) 16,5% кўпайди, деб хабар беради Ўзбек телеграф агентлиги (ЎзТАГ).

Компаниянинг Давлат рақобат қўмитаси қошидаги Қимматли қоғозлар бозорини мувофиқлаштириш ва ривожлантириш маркази томонидан эълон қилинган молиявий ҳисоботида, ширкатнинг маҳсулот реализациясидан тушган соф тушуми миқдори 1,22 млрд сўмни ташкил этгани таъкидланади (2013 йилда 588,2 млн сўм). Компания даромадларининг катта қисмини молия фаолиятидан олган бўлиб, унинг миқдори 9,993 млрд сўмни ташкил этди. Унинг асосий қисми – 9,846 млрд сўмини (95,8%) дивидендлар ташкил қилди.

Шу билан бирга, компания активлари 1,6 трлн сўмга (+64%), резерв капитали 1,24 млрд сўмга (+10%) етди. Низом капиталининг рентабеллик коэффициенти 140,4%, қоплаш ва умумий тўлов қобилияти 1,04%, мутлақ ликвидлик кўрсаткчичи 0,01% ташкил қилди.

Эслатиб ўтамизки, “Ўзгеобурнефтегаз” АЖ 2006 йилда “Ўзбекнефтегаз” МХК таркибида ташкил этилган. Компаниянинг асосий фаолияти нефть ва газ бўйича геология қидирув ишлари, скважиналар қазиш ва қуриш ишлари билан шуғулланувчи шўъба корхоналари фаолиятини назорат қилиш ва мувофиқлаштириш, улар ишлаб чиқариш ва хўжалик фаолиятини бошқариш ҳисобланади.

Компания таркибига 15 акционерлик жамияти ва 8 шўъба корхонаси киради.

$1 = 2555,6 сўм