2014 йилда Ўзбекистон Кичик бизнес экспортига кўмаклашиш жамғармаси қиймати $1,2 млрд. бўлган битимларни тузишга кўмаклашди

Тошкент. 12 январ. ЎзТАГ –Ўзбекистон Ташқи иқтисодий фаолият миллий банки қошидаги Кичик бизнес ва хусусий тадбиркорлик субъектларига кўмаклашиш жамғармаси 2014 йилдаги фаолиятига якун ясади, дея хабар беради Ўзбек телеграф  агентлиги (ЎзТАГ).

“Жамғарма томонидан 2400 ортиқ тадбиркорлик субъектларига маҳсулот ва хизматлар экспортида ташкилий, ҳуқуқий ва молиявий кўмак кўрсатилди. Натижада $1,25 млрдлик шартномалар тузилди, 699 тадбиркорлик субъектлари умумий қиймати $840 млндан ортиқ бўлган маҳсулот ва хизматларни экспорт қилдилар” – деб таъкидланади Жамғарма матбуот хизмати хабарида.

Бундан ташқари, 1774 тадбиркорларга ташқи бозорларни ўрганиш бўйича, жумладан, 140 тадбиркорга хорижий ҳамкорларни топишда, 271 тадбиркорга хорижий кўргазма, ярмарка, халқаро тендер савдоларида қатнашишда ташкилий ва ҳуқуқий кўмак кўрсатилди. Шунингдек, қатор тадбиркорга халқаро сертификатлар, божхона расмийлаштируви учун рухсатномалар олишда, 327 тадбиркорга экспорт шартномалари тузишда, уларни ваколатли органларда рўйхатдан ўтказишда, 27 тадбиркорга экспорт битимлари бўйича суғурта полислари олишда ёрдамлашилди.