2014 йилда Ўзбекистондаги Ucell мобил алоқа оператори роуминг бўйича 48 шартнома тузди

Тошкент. 8 январ. ЎзТАГ – 2014 йилда Ўзбекистондаги Ucell мобил алоқа оператори роуминг бўйича 48 шартнома тузди. Бу унга дунёнинг 163 мамлакати ва 421 тармоғида алоқада бўлишга имкон берди, дея хабар беради Ўзбек телеграф агентлиги (ЎзТАГ).

Компаниядан хабар қилишларича, бундан ташқари, Ucell абонентларида ҳозирда MultiSIM ўтказгич корпуслари (оддий SIM-карта, Micro, Nano) бўлган SIM-картадан фойдаланиш имконияти ҳам мавжуд. Шунингдек, 4G мобил алоқа технологияси ҳам ишга туширилиб, бу орқали мижозларга 4G интернет-пакетлар ва қурилмалар таклиф этилмоқда.

Эслатиб ўтамизки, 2014 йилнинг ёзида ушбу мобил алоқа оператори Ўзбекистон телекоммуникация бозоридаги фаолиятининг 6 йиллигини нишонлади.

Ўтган йили компания Олмалиқ ва Урганч шаҳарларида хизмат кўрсатиш нуқталарини очди. Шунингдек, Тошкентда Ucell Mobile City номли янгиланган офис ишга туширилди.

2014 йилнинг декабри охирига оид маълумотларга кўра, ҳозирда Ucell 8,5 млндан ортиқ абонентларга хизмат кўрсатмоқда.