2014 йилнинг биринчи чорагида “Ўзсаноатқурилишбанк” $273,3 млнлик пул ўтказмаларини қабул қилиб олди

Тошкент. 13 август. ЎзТАГ – 2014 йилнинг биринчи чорагида “Ўзсаноатқурилишбанк” акционерлик-тижорат банки ўзининг халқаро пул ўтказмалари пунктлари орқали $273,3 млнлик пул ўтказмаларини қабул қилиб олди ва $11,9 млнлик маблағларни жўнатди, дея хабар беради Ўзбек телеграф агентлиги (ЎзТАГ).

Банкдан хабар қилишларича, бугунда муассаса 94 та халқаро пул ўтказмалари пунктларига эга бўлиб, ушбу сегментда Ўзбекистон банк тизимида етакчилардан бири ҳисобланади.

Ҳозирда “Ўзсаноатқурилишбанк” акционерлик-тижорат банки “Золотая корона”, “Unistream”, “Interexpress”, “Blizko”, “Money Gram” ва “Western Union” халқаро пул ўтказмалари тизимлари бўйича ишламоқда.

Эслатиб ўтамизки, “Ўзсаноатқурилишбанк” акционерлик-тижорат банки Ўзбекистоннинг етакчи банкларидан бири бўлиб, ўз ишини 1922 йилда бошлаган.