2015 йил январ-октябрда ўзбек-поляк товар айланмаси 20% қисқарди
Тошкент. 21 декабр. ЎзТАГ – 2015 йил январ-октябрда ўзбек-поляк товар айланмаси $113,5 млн атрофидани ташкил этиб, 2014 йилнинг муқобил давридагига қараганда 20% қисқарди, деб хабар беради Ўзбек телеграф агентлиги (ЎзТАГ).
Ушбу маълумотлар Польшанинг Ўзбекистондаги элчихонасининг савдо ва инвестицияларга кўмак бериш бўлими томонидан Тошкентда уюштирилган учрашувда келтирилган.
Бўлим бошлиғи в.б. Яцек Михальскининг сўзларига қараганда, бу ҳол асосан ташқи омиллар, шу жумладан, талабнинг бутун жаҳон миқёсида қисқариши, шунингдек, Россия эмбаргоси туфайли логистиканинг қийинлашгани билан боғлиқдир.
Польшанинг Ўзбекистонга экспортида йирик чорва моллари (умумий экспортнинг 30% ошиғи), кимё саноати маҳсулотлари (24%), машина ва ускуналар (17% атрофида) улушлари етакчилик қилади. Полша Ўзбекистонга жами 20 турдаги товар номенклатуралари молларини экспорт қилади.
Ўзбекистон Полшага пахта, ундан тайёрланган маҳсулотлар, текстиль, (умум экспортнинг 50% ошиғи), кимё саноати маҳсулотлари (22% зиёд), минерал маҳсулотлар (19%) импорт қилади. Ўзбекистон Полшага жами 12 товар номенклатурасидаги маҳсулотлар етказиб беради.
