2015 йилдан Ўзбекистонда бизнес соҳасига доир қонунлар online режимда муҳокама қилинади
Тошкент. 9 декабр. ЎзТАГ – Ўзбекистонда 2015 йилнинг 1 январидан бошлаб тадбиркорлик фаолияти соҳасига оид ишлаб чиқарилаётган қонунчилик актлари Ягона интерактив давлат хизматлари порталида (ЯИДХП) online режимда муҳокама қилинади. Бу ҳақида ҳукуматнинг сешанба куни эълон қилинган қароридан маълум бўлди, дея хабар беради Ўзбек телеграф агентлиги (ЎзТАГ).
Қарор билан ишлаб чиқилаётган ва қабул қилинган меъёрий ҳуқуқий актларнинг тадбиркорлик фаолиятига таъсирига баҳо бериш тартиби ҳақидаги низом ҳам тасдиқланган. Хужжатга мувофиқ, меъёрий ҳуқуқий хужжатлар ишлаб чиқувчилари муҳокама иштирокчиларидан келиб тушган таклифларни умумлаштирадилар ва уларнинг қабул қилинганлиги ёки рад этилганда бунинг сабаблари ҳақидаги маълумотни ЯИДХПда жойлаштирадилар.
Лойиҳа бўйича муҳокама иштирокчиларидан келиб тушган таклифларни ҳисобга олиш ва шундан келиб чиқиб лойиҳани такомиллаштириш белгиланган муддатларда амалга оширилади, лекин муддат муҳокама тугалланганидан кейин 30 кундан ошмаслиги зарур, дейилади хужжатда.
Ушбу тартибнинг жорий этилиши ишлаб чиқилаётган лойиҳа ва қабул қилинган меъёрий ҳуқуқий актларда коррупция учун, давлат ҳокимияти ва бошқаруви тизимида бошқа қонунбузарликларни содир этиш учун шароит яратувчи, тадбиркорлар учун маъмурий тўсиқлар пайдо қилувчи ўринларни топишга ёрдам беради, деб таъкидланади хужжатда.
Эслатиб ўтамикзки, 2013 йилнинг январида Ўзбекистон президенти ҳукуматга 2013-2017 йилларда республикада “Электрон ҳукумат” тизимини шакллантириш ҳақида буйруқ берган эди. Ҳозирга келиб ушбу йўналишда 20 ошиқ лойиҳалар амалга оширилди. Хусусан, 2013 йил 1 июлдан ЯИДХП ишга туширилди ва у орқали 170 интерактив хизматлар кўрсатилмоқда.
