2016 йилда Сурхандарё вилоятида портландцемент ишлаб чиқариш бўйича Марказий Осиёдаги энг йирик завод қурилиши бошланади
Термиз. 24 апрел. ЎзТАГ – 2016 йилда Олмалиқ тоғ-металлургия комбинати Сурхандарё вилоятининг Шеробод туманида портландцемент ишлаб чиқариш бўйича қиймати $225 млнлик Марказий Осиёдаги энг йирик завод қурилиши бошлашни режалаштирмоқда, дея хабар беради Ўзбек телеграф агентлиги (ЎзТАГ).
2018 йилда эксплуатацияга топширилиши режалаштирилаётган объект портландцемент ишлаб чиқариш бўйича Марказий Осиёдаги энг йирик завод бўлиб, йилига 1,5 млн тоннагача портландцемент чиқаради.
Stroyka.uz ресурси маълумотларига кўра, лойиҳани амалга ошириш учун ОТМК $24,4 млн ўз маблағи, Ўзбекистон тикланиш ва тараққиёт жамғармасининг $90 млн кредити, тижорат банкларининг $110,6 млн кредитларини жалб қилинади.
Олдин ҳабар берганимиз каби, 2020 йилга қадар ОТМК 17 инвестиция лойиҳаларини амалга оширади, уларнинг умумий қиймати эса $2,46 млрд атрофида.
Эслатиб ўтамизки, 2014 йил мартда ОТМК Жиззах вилоятида янги цемент заводини ишга туширган эди. 2015 йил апрелда комбинат туркиянинг Dal Teknik Makina Ticaret ve Sanayi A.S. ширкати билан унинг қувватларини кенгайтириш ҳақида шартнома имзолади. Қиймати $35,8 млнлик лойиҳа амалга оширилгач бу ерда портландцемент ишлаб чиқариш йилига 760 минг тоннадан 1 млн тоннагача кўпаяди.
