2016 йилда Ўзбекистон иқтисодиётига $16,6 млрддан зиёд инвестиция киритилди
Тошкент. 16 январ. ЎзТАГ – 2016 йилда Ўзбекистон иқтисодиётига $16,6 млрддан зиёд инвестиция киритилди, бу эса 2015 йилдагига нисбатан 9,6% кўпдир, деб хабар беради Ўзбек телеграф агентлиги (ЎзТАГ) президент Шавкат Мирзиёевнинг маърузасига асосланган ҳолда.
“Ўзлаштирилган хорижий инвестициялар ва кредитлар ҳажми 11,3%га ўсди ва $3,7 млрддан ошиб кетди. Умумий қиймати 5,2 млрд бўлган 164та йирик инвестиция лойиҳаларини амалга ошириш якунланди. Шу жумладан, “ЖМ Ўзбекистон” акциядорлик жамиятида “Т-250” моделдаги енгил автомобилларни ишлаб чиқариш ўзлаштирилди, Жиззах вилоятида цемент заводи кенгайтирилди, Толимаржон иссиқлик энергия станциясида қуввати 900 МВт бўлган буғ-газ қурилмалари ҳамда Ангрен иссиқлик энергия станциясида қуввати 150 МВт бўлган юқори кулли кўмирни ёқувчи энергия блоки ишга туширилди”, - деб таъкидлади Ш.Мирзиёев ҳукуматнинг 2016 йил якунларига бағишланган йиғилишидаги чиқишида.
Унинг сўзларига кўра, Фарғона водийси вилоятларини мамлакатнинг бошқа ҳудудлари билан боғлайдиган, Қамчиқ тоғли довони орқали ўтувчи 19 километрлик ноёб туннелга эга бўлган электрлаштирилган янги Ангрен – Поп темир йўл линияси қурилиши, Тошкент – Бухоро маршрути ва қарама-қарши йўналиш бўйича юқори тезланишли “Афросиёб” йўловчи ташувчи электропоездлар ҳаракати ташкил этилгани ҳам муҳим аҳамият касб этди.
“Хусусий мулк ва тадбиркорликни ҳар томонлама қўллаб-қувватлаш ва ҳимоя қилиш бўйича чора-тадбирларнинг амалга оширилиши 2016 йилда 32 мингтага яқин ёки 2015 йилга нисбатан 18%га кўп кичик бизнес субъектлари ташкил қилинишига туртки бўлди. Кичик бизнеснинг мамлакат ялпи ички маҳсулотидаги ҳиссаси 56,9%гача, саноатда эса 45%гача ошди”, - деди яна Шавкат Мирзиёев.
