2016 йилнинг биринчи чорагида “Тошкент” РФБ умумий биржа айланмаси 1,3 бараварга ўсди

Тошкент. 11 апрел. ЎзТАГ – 2016 йилнинг биринчи чорагида “Тошкент” Республика фонд биржасининг (РФБ) умумий биржа айланмаси ўтган йилнинг муқобил даври билан солиштирганда 1,3 бараварга ўсиб, 73 млрд сўмдан ошди, деб хабар беради Ўзбек телеграф агентлиги (ЎзТАГ).

“Йил бошидан бери жами 983 биржа битими тузилиб, 55 акционерлик жамиятининг 30,5 млн акциялари сотилди. Биржа айланмаси таркибида қимматли қоғозлар бирламчи жойлаштируви бозори етакчилик қилмоқда. Унинг улуши биржа умумий айланмасининг 56,6% ёки 41,3 млрд сўмини ташкил қилди. Бирламчи бозор айланмалари 2015 йилнинг 1 чораги билан солиштирганда деярли 4,5 бараварга ошди”, - деб таъкидлашди “Тошкент” РФБ матбуот хизматида.

Иккиламчи қимматли қоғозлар муомаласининг ялпи улуши 43,4% ёки 31,7 млрд сўмга етди. Бундан 19,3 млрд сўми (26,4%) – давлат активларидир.

Инвесторлар тоифасига келсак, юридик шахслар инвестицияларининг улуши биржа айланмасининг 57,1 млрд сўми ёки 78,3% ташкил қилди. Бунда хорижий инвесторлар улуши 13,1% ёки 9,5 млрд сўмга тенг.

2016 йилнинг 31 март ҳолатига келиб биржа котировкалари рўйхатига кирувчи акционерлик жамиятларининг бозор капитализацияси кўрсаткичи 8,5 трлн сўмдан ошди.

$1 = 2882,68 сўм