2017 йилда Ўзбекистон омбудсмани 9074 мурожаатларни кўриб чиқди

Тошкент. 19 феврал. ЎзТАГ – 2017 йилда Ўзбекистон Омбудсмани идорасига 9074 та мурожаат келиб тушди, шундан 1774 та мурожаат шахсий қабуллар ва шахсий сафарлар чоғида тушган, деб хабар беради Ўзбек телеграф агентлиги (ЎзТАГ).

Ушбу маълумотлар Ўзбекистон Қонунчилик палатасининг Ўзбекистон Республикаси Олий Мажлисининг Инсон ҳуқуқлари бўйича вакили (Омбудсман) Улуғбек Муҳаммадиевнинг ахбороти эшитилган йиғилишида келтирилди.

Уларни кўриб чиқиш натижалари бўйича ваколатли органлар томонидан 25 та жиноят иши, 27 та маъмурий ва 44 та интизомий иш қўзғатилди, ички ишлар органларининг 24 нафар ходими, ижтимоий ва бошқа соҳаларнинг 35 нафар ходими жавобгарликка тортилди, жиноят иши қўзғатишни рад этиш тўғрисидаги 24 та қарор бекор қилинди, судларга 10 та протест ва даъво киритилди, 34 нафар фуқаро ишга жойлаштирилди ва ишига қайта тикланди.

53 та оилага – турлича моддий ёрдам, 39 нафар фуқарога – тиббий ёрдам кўрсатилди, давлат даромадига – 2 млрд. 319 млн. сўм, мурожаат қилувчилар фойдасига – 263 млн. сўм ундирилди, бизнесни ривожлантириш учун умумий суммаси 133 млн. сўм миқдорида кредитлар берилди.

Шунингдек, қамоқда сақланаётган шахсларга нисбатан ноқонуний ҳаракатлар содир этиш ҳолатларига доир шикоятларни Омбудсман томонидан кўриб чиқиш натижалари тўғрисида парламент палаталарини мунтазам равишда хабардор қилиш тартиботи жорий этилгани таъкидланди.

Бундан ташқари, қийноқларга солишга ва муомалада бўлиш ҳамда жазолашнинг бошқа шафқатсиз, ғайриинсоний ёки қадр-қимматни таҳқирловчи турларига йўл қўймаслик бўйича назорат-таҳлил тадбирларини ташкил этиш ва ўтказишнинг ҳамкорликдаги жадвали тасдиқланди.

$1=8188,33 сўм

Сурат манбаи: https://nuz.uz/intervyu/17396-ulugbek-muhammadiev-institut-ombudsmana-na-zaschite-prav-i-svobod-cheloveka.html