2018 йил 1 январдан Хитой билан халқаро автомобил алоқасига доир ҳукуматлараро битим кучга киради
Тошкент. 12 декабр. ЎзТАГ – 2018-йил 1-январдан Ўзбекистон Республикаси Ҳукумати ва Хитой Халқ Республикаси Ҳукумати ўртасида халқаро автомобиль транспорти тўғрисидаги битим кучга киради, деб хабар беради Ўзбек телеграф агентлиги (ЎзТАГ).
Эслатиб ўтамизки, ҳужжат Ўзбекистон Республикаси Президенти Шавкат Мирзиёевнинг Хитой Халқ Республикасига давлат ташрифи доирасида 2017-йил 12-майда имзоланган.
Ўзбекистон ташқи ишлар вазирлиги маълумотига кўра, битимнинг асосий мақсади икки давлат ўртасида халқаро автомобил ташувларини ва уларнинг ҳудудлари орқали транзит ўтишларни амалга ошириш учун ўзаро мақбул ҳуқуқий шароитларни яратиш ҳисобланади.
Битимга мувофиқ, томонлар икки давлатдан бирида рўйхатдан ўтган транспорт воситалари орқали ваколатли давлат органларининг ўзаро келишуви асосида белгиланган йўналишда халқаро автомобил ташувларини ўз давлатлари ҳудудида амалга ошириш ҳуқуқини берадилар.
Ҳужжатнинг шартларига мувофиқ, икки томонлама ва транзит ташувлар икки мамлакатнинг ваколатли органлари, хусусан, Ўзбекистон автомобил ва дарё транспорти агентлиги ва ХХР Транспорт вазирлиги томонидан берилган рухсатномалар асосида амалга оширилади. Шу мақсадда ваколатли органлар ҳар йили бир-бирига юклар олиб ўтиш учун рухсатнома бланкаларининг ўзаро келишилган миқдорини тақдим қилишади.
“Мазкур битим икки томонлама ҳамкорликни янада ривожланишига ижобий туртки беради, икки мамлакат ўртасидаги савдо-иқтисодий алоқаларни янада кенгайиши учун янги истиқболларни очади ва ўзаро манфаатли ташувлар бозорини шакллантиришга хизмат қилади”, - дейилади хабарда.
Сурат манбаи: http://translinecompany.ru/kontejnernye-avtoperevozki
