2018 йилда Ўзбекистон ва АҚШ ўртасидаги товар айланмаси деярли $300 млнга етди

Тошкент. 13 сентябр. ЎзТАГ – 2018 йилнинг 8 ойида Ўзбекистон ва АҚШ ўртасидаги товар айланмаси деярли $300 млнга етди, деб хабар беради Ўзбек телеграф агентлиги (ЎзТАГ).

Бу ҳақида 12-сентябр куни Ўзбекистон Ташқи ишлар вазирлигида АҚШ Давлат котибининг иқтисодиёт ва бизнес масалалари бўйича ёрдамчисининг биринчи ўринбосари Брайан Макфитерс билан учрашувда сўз борди.

“2018-йилнинг 8 ойи давомида ўзаро савдо айланмаси деярли $300 млнни ташкил этди. 2017-йил бўйи эса бу кўрсатгич $210,2 млнга тенг бўлган эди. Шу билан бирга мазкур соҳадаги ўзаро манфаатли ҳамкорликни янада ошириш учун сезиларли салоҳиятнинг мавжудлиги эътироф этилди ва бунга икки томонда ҳам қизилиш борлиги таъкидланди”, - дейилади Ўзбекистон ташқи ишлар вазирлиги матбуот хизматининг хабарида.

Шунингдек, суҳбатда Ўзбекистон президенти Шавкат Мирзиёевнинг жорий йил 15-17-май кунлари АҚШга қилган расмий ташрифи ва президент Доналд Трамп билан ўтказган музокаралари чоғида эришилган келишувларни амалга ошириш нуқтайи назаридан икки давлат ўртасидаги савдо-иқтисодий ва инвестиция алоқаларининг ҳозирги ҳолати ва уларни оширишнинг истиқболлари тўғрисида фикр алмашилди.

Бундан ташқари, учрашувда Ўзбекистон-Америка кун тартибининг бошқа масалалари, жумладан мамлакатимизда Америка бизнес ҳафталигини ўтказишга тайёргарликнинг бориши ҳам муҳокама қилинди.

Суҳбатда АҚШ Элчиси Памела Леора Спратлен иштирок этди.

Эслатиб ўтамизки, АҚШ Давлат котибининг иқтисодиёт ва бизнес масалалари бўйича ёрдамчисининг биринчи ўринбосари Брайан Макфитерс бошчилигидаги АҚШ делегацияси Ўзбекистонг 12 сентябрда келган эди.

Сурат манбаи: из https://kun.uz