2021 йилга қадар Ўзбекистонда 260 минг атрофида иш жойлари яратиш режалаштирилмоқда
Тошкент. 9 феврал. ЎзТАГ – 2021 йилга қадар Ўзбекистонда 260 минг атрофида иш жойлари яратиш режалаштирилмоқда, деб хабар беради Ўзбек телеграф агентлиги (ЎзТАГ).
Бу 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясининг “Ижтимоий соҳани ривжлантириш” номли тўртинчи йўналиши билан кўзда тутилган.
Хусусан, расмий маълумотларга кўра, ҳудудларни ҳар томонлама ривожлантириш бўйича қарийб 25 мингта инвестиция лойиҳасини рўёбга чиқариш ҳисобига 256,4 минг иш ўрни ташкил этиш орқали аҳолини иш билан таъминлаш дастурларини тўлиқ ижро этиш назарда тутилган. Ишсизлик даражаси энг юқори бўлган минтақаларда 46,8 минг янги иш ўрни ташкил этиш, тадбиркорлик фаолиятини бошлаш учун таълим муассасаларининг 10 минг нафар битирувчисига кредитлар ажратиш режалаштирилмоқда.
Эслатиб ўтамизки, “2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси” президент Шавкат Мирзиёевнинг қарори билан 2017 йил 7 февралда тасдиқланган. Унда 5 устувор йўналиш белгиланган бўлиб, уларнинг ҳар бири республикада ислоҳот ва янгиланишларни янада чуқурлаштириш бўйича аниқ бўлимларни ўз ичига олади.
Ҳаракатлар стратегияси беш босқичда амалга оширилиб, уларнинг ҳар бири бўйича йил номланишидан келиб чиққан ҳолда алоҳида бир йиллик давлат дастурини тасдиқлашни назарда тутади.
