2030 йилга қадар Ўзбекистон электротехника тармоғи $1 млрддан зиёд инвестицияларни ўзлаштиришни режалаштирмоқда

Тошкент. 21 июн. ЎзТАГ – 2030 йилга қадар “Ўзэлтехсаноат” акционерлик компанияси $1 млрддан зиёд инвестицияларни ўзлаштиришни режалаштирмоқда, деб хабар беради Ўзбек телеграф агентлиги (ЎзТАГ).

“Бу 22 турдаги янги маҳсулотларни ишлаб чиқаришни ўзлаштириш ва тармоқда ишлаб чиқариш ҳажмларини 5,1 бараварга ошириш имкониятини беради. Фақат 2016 йилда кондиционерлар ишлаб чиқаришни 8,6%, газ ва электрик плиталар ишлаб чиқаришни 6,7%, телевизорлар ишлаб чиқаришни 6,5%, музлатгичлар ишлаб чиқаришни 4,6%, кир ювиш машиналари ишлаб чиқаришни 3,1% кўпайтириш режалаштирилмоқда”, - деб таъкидлашди компанияда.

Эслатиб ўтамизки, жорий йилнинг биринчи чораги якунлари бўйича республикада 227,3 млрд сўмлик электротехника маҳсулотлари ишлаб чиқарилиб, ўтган йилга нисбатан 20% ўсиш қайд этилди.

Кейинги 5 йилда тармоқ корхоналари 25 турдан ортиқ олдинлари импорт қилинаётган техника турларини ўзлаштирдилар. Натижада ўтган йилда маҳаллий техника ички бозорнинг 40-45% эгаллади.