419 жамоадан 12 финалчи стартап-лойиҳаларини “Demo Day”да тақдим этиш имконига эга бўлдилар
Тошкент. 18 декабр. ЎзТАГ – Ёшларнинг стартап-ташаббусларини қўллаб-қувватлаш бўйича уч ойлик дастурнинг иккинчи доираси “Demo Day” махсус тадбири билан якунланди, деб хабар беради Ўзбек телеграф агентлиги (ЎзТАГ).
БМТТДнинг Ўзбекистондаги ваколатхонаси маълумотларига кўра, ариза юборган 419 та жамоадан 40 таси саралаб олиниб, улардан 19 та жамоа иккинчи даврнинг финал босқичига етиб келди. Булардан фақат 12 та финал иштирокчиси “Demo Day” тадбирида салоҳиятли инвесторлар ва манфаатдор ташкилотларга ўз стартап-лойиҳаларини тақдим этиш имкониятига эга бўлдилар.
Махсус ҳакамлар ҳайъати томонидан жамоаларнинг тақдимотлари натижалари бўйича мантиқийлик ва талабга жавоб бериш, амалий татбиқ этиш имконияти, технологик янгилиги ва жамоанинг кўникмаси каби қатор мезонларга жавоб берадиган бир нечта лойиҳалар рағбатлантирувчи совғаларни топшириш учун танлаб олинди.
Биринчи ўрин учун соврин “Unibot 3D Принтер” лойиҳасига топширилди. Лойиҳа турли вазифага мўлжалланган 3D-принтерларни ишлаб чиқариш, улар учун хомашё тайёрлаш, 3Dда чоп этиш хизматларини ичига олади. Иккинчи ўринни иккита жамоа – “Milliyrasmlar.uz” ва “Talker” лойиҳалари бўлишиб олдилар. Учинчи ўринни “BestTest.uz” лойиҳаси эгаллади.
Сурат манбаи: фото из открытых источников
