5 йилдан ошган механизмларни Ўзбекистондан эркин экспорт қилиш мумкин
Тошкент. 28 август. ЎзТАГ – 5 йилдан ошган механизмларни Ўзбекистондан эркин экспорт қилиш мумкин, деб хабар беради Ўзбек телеграф агентлиги (ЎзТАГ).
Бу Ўзбекистон Вазирлар Маҳкамасининг жорий йил 17 августлаги 642-сон “Илгари ишлатилган машиналар, асбоб-ускуналар ва механизмларни экспорт қилишга рухсат бериш тартиби тўғрисида низом” билан кўзда тутилган.
Ташқи савдо вазирлиги маълумотига кўра, низом “Тадбиркорлик соҳасидаги рухсат берувчи тартиблар тўғрисида”ги қонунга мувофиқ мамлакат юридик ва жисмоний шахслари томонидан илгари ишлатилган машиналар, асбоб-ускуналар ва механизмларни экспорт қилишга рухсат бериш тартиби белгиланган.
Илгари ишлатилган, тайёрланган вақтидан буён камида 5 йил ўтган, илгари хорижий юридик шахслар томонидан бепул келтирилган, “эркин муомалада бўлиши (импорт) учун ишлаб чиқарилган” божхона режимида расмийлаштирилган тасдиқланган рўйхат бўйича машиналар, асбоб-ускуналар ва механизмларни, экспорт қилиш учун рухсат талаб этилмайди.
Илгари ишлатилган, тайёрланган вақтидан буён камида 5 йил ўтган тасдиқланган рўйхат бўйича машиналар, асбоб-ускуналар ва механизмларни экспорт қилишга рухсат олиш учун аризачи ваколатли органга мурожаат қилиши зарур.
