7 ойда “Ўзсаноатқурилишбанк” кичик бизнесга 500 млрд сўмлик кредитлар берди

Тошкент. 19 август. ЎзТАГ – 2015 йилнинг 7 ойида “Ўзсаноатқурилишбанк” акционерлик тижорат банки (ЎзСҚБ) кичик бизнес ва хусусий тадбиркорликни ривожлантиришга 500 млрд сўмлик кредитлар берди. Йил якунлари бўйича ушбу мақсадларда 844 млрд сўм ажратиш режалаштирилган, деб хабар беради Ўзбек телеграф агентлиги (ЎзТАГ).

Банк матбуот хизмати маълумотларига кўра, хусусан, 2015 йилда кам қувватли ва фаолиятсиз корхоналарда ишлаб чиқаришни қайта тиклаш ҳамда бўш турган ва қурилиши тугалланмаган объектлар негизида янги ишлаб чиқаришларни ташкил этиш орқали янги иш ўринларини яратиш бўйича 122та лойиҳаларга 60,4 млрд сўм кредитлар ажратиш режалаштирилган. Ўтган 7 ой давомида 66та корхоналарга жами 30,9 млрд сўм миқдорида кредит маблағлари ажратилди.

Эслатиб ўтамизки, биринчи ярим йилликда ЎзСҚБ 2,18 минг кичик бизнес ва хусусий тадбиркорлик субъектларига 435 млрд сўм кредит маблағлари ажратди.