7 ўзбек банки МДҲ Топ-200 банклари рўйхатига кирди

Тошкент. 22 август. ЎзТАГ – РИА-Рейтинг агентлиги томонидан тайёрланган МДҲ Топ-200 банклари рўйхатига бирданига 7 ўзбек банки кирди, дея хабар қилади Ўзбек телеграф агентлиги (ЎзТАГ).

Топ-200 банклар рўйхати РИА-Рейтинг сайтида эълон қилинган.

Ўзбекистоннинг энг йирик банки – Ташқи иқтисодий фаолият миллий банки 7,3% ўсиш намоён қилиб, активлари миқдорини $5,1 млрдга етказган ҳолда рейтингда 55 ўринни олди.

Яна бир ўзбек банки – “Ўзсаноатқурилишбанк” 2014 йил 1 январ ҳолатига келиб активлари ҳажмини доллар ҳисобида 22% ўстирди ва $3,1 млрдга етказган ҳолда рейтингнинг 89 ўринда жойлашди.

Қолган банклар қуйидаги ўринларни эгалладилар: “Асака” банки – 118 ўрин, Ипотека-банк (155), Халқ банки (166), Агробанк (172), “Қишлоқ қурилиш банк” (177).

МДҲ Топ-200 банклари рейтинги РИА Рейтинг рейтинг агентлиги томонидан МДҲ банк тармоғининг 2013 йил якунлари бўйича тадқиқи асосида тузилган.

Рейтинг маълумотлари банкларнинг молиявий ҳисоботлари, МДҲ мамлакатлари Марказий банклари статистик бюллетенлари ва бошқа очиқ манбалардан олинган. Ушбу рейтинг агентлик экспертлари томонидан тузилган МДҲ банкларининг активлар миқдори бўйича тўртинчи рейтингдир.