8 ой ичида Хитой Тожикистонга автомобил экспортини 56,2% кўпайтирди, Марказий Осиё мамлакатларига эса деярли 22% камайтирди

Тошкент. 8 октябр. ЎзТАГ – Январ-августда Хитой Тожикистонга 2054 автомобил экспорт қилди, бу ўтган йилдаги кўрсаткичга қараганда 56,2% кўп. Марказий Осиё (МО) мамлакатларига экспорт эса 22% пасайди, деб хабар беради Тожик телеграф агентлиги (ТожикТА) чоршанба куни.

Урумчи божхонасининг Хитой ОАВга асосланган ҳолда қайд этишича, йил бошидан бери хитой автомобилларининг МО мамлакатларига экспорти ҳажмлари, шунингдек, автомобиллар баҳоларининг пасайганлиги кузатилмоқда.

Манбанинг маълумотларига кўра, жорий йилнинг августи охирига келиб Шинжон назорат ўтказиш пунктлари орқали МО мамлакатларига жами 11 минг автомобиллар экспорт қилинган бўлиб, бу ўтган йилнинг муқобил давридагига қараганда 21,8% оз демакдир. Айни пайтда битимларнинг қиймати $380 млнни ташкил этди. Бу эса автомобиллар қийматининг 31,3% камайганлигини билдиради.

Хусусан, 8 ой ичида Хитой Марказий Осиё мамлакатларига 8529 юк машинаси (- 21,1%), 1398 дона (-17,5%) махсус автомобиллар етказиб берган.

Январ-августда Хитойнинг Шинжон назорат ўтказиш пунктларидан Ўзбекистонга 2823 автомобил (2 баравар кўп), Туркманистонга 1511 автомобил (71,2% кўп), Қозоғистонга 2674 автомобил (- 68,4%) экспорт қилинган.