8 ойда “Ўзсаноатқурилишбанк” кичик бизнесга кредитлар ажратишни учдан бирга кўпайтирди

Тошкент. 15 сентябр. ЎзТАГ – 2015 йилнинг 8 ойида “Ўзсаноатқурилишбанк” кичик бизнес субъектларига 584 млрд сўмлик кредитлар ажратди ва бу ўтган йилнинг муқобил давридагига қараганда 1,3 бараварга кўпдир, деб хабар беради Ўзбек телеграф агентлиги (ЎзТАГ).

“Жумладан, 58,5 млрд сўм микрокредитлар, хизмат кўрсатиш ва сервис соҳасини ривожлантиришга 53,4 млрд сўм, касб-ҳунар коллежлари битирувчиларининг тадбиркорлик фаолиятини йўлга қўйиш учун 9,7 млрд сўм, аёл тадбиркорларга 38,8 млрд сўм, оилавий тадбиркорликни ривожлантиришга 9,1 млрд сўм, озиқ-овқат товарлари ишлаб чиқаришни кенгайтиришга 89,8 млрд сўм, ноозиқ-овқат товарлари ишлаб чиқаришни кенгайтиришга - 138,2 млрд сўм кредитлар ажратилди”, – деб таъкидлашди банк матбуот хизматида.

2015 йилда кичик бизнес субъектларини қўллаб қувватлашга 844 млрд сўм кредит маблағлари ажратиш режалаштирилган.