9 ойда Ўзбекистонда деярли 3,4 трлн сўмлик қурилиш материаллари ишлаб чиқарилди
Тошкент. 27 октябр. ЎзТАГ – 2015 йилнинг 9 ойида Ўзбекистон қурилиш материаллари саноати томонидан 3388,1 млрд сўмлик маҳсулотлар ишлаб чиқарилди, бу эса 2014 йилнинг муқобил даврига нисбатан 15,9% кўпдир, деб хабар беради Ўзбек телеграф агентлиги (ЎзТАГ).
Давлат статистика қўмитасидан маълум қилишларича, тармоқнинг умумий саноат ҳажмидаги улуши 5,4%ни ташкил этди.
Тармоқнинг йирик саноат корхоналари томонидан ишлов берилган мармар, травертин, алебастр ва улардан тайёрланган буюмлар – 29,3%га, каолин – 4,3 мартага, листланган шиша 1,4 мартага, қурилиш учун ўтга чидамсиз керамик ғиштлар 17,3%га, томга ёпиш учун керамик черепица 6,7%га, йўл қопламалари учун асфалтли аралашмалар ишлаб чиқариш ҳажми 8,0%га кўпайтирганлиги таъкидланмоқда.
Шунингдек, қурилиш материаллари чиқарувчи йирик корхоналар томонидан портландтцемент ишлаб чиқариш 13,6%га, гипс ишлаб чиқариш 10,3%га, шағал 7,8%га, оҳактош 41,7%га, товар бетон 2,3 мартага, қурилиш учун қоришмалар ва аралашмалар ишлаб чиқариш 2 мартага ўсган.
Қурилиш материаллари ишлаб чиқариш ҳажмининг асосий қисми Навоий (тармоқнинг умумий ҳажмига нисбатан 20,7%), Тошкент (20,4%), Фарғона (12,9%) вилоятлари ва Тошкент шаҳри (11,3%) корхоналари хиссасига тўғри келган.
Кичик тадбиркорликни қўллаб-қувватлаш бўйича амалга оширилган чора-тадбирлар, кичик бизнес субъектлари томонидан ишлаб чиқарилган маҳсулотлар ҳажмининг ўсишига олиб келган. Улар томонидан чиқарилган саноат маҳсулотлари ҳажми 28,6% ўсиб, тармоқнинг жами саноат ҳажмидаги улуши эса 50,9%га етди.
Эслатиб ўтамизки, ҳозирги пайтда республикада 5040 қурилиш материаллари ишлаб чиқарувчи корхоналар фаолият кўрсатаётган бўлиб, улардан 604таси 2015 йилда ташкил қилинган.
$1 = 2677,75 сўм
