АҚШ элчихонаси ёш пианиначининг Тошкентдаги концертини қўллаб-қувватлади
Тошкент. 21 декабр. ЎзТАГ – 22 декабрда Тошкентдаги АҚШ элчихонаси кўмагида Ўзбекистон Давлат Консерваториясида истеъдодли пианиначи Артём Пакнинг концерти бўлиб ўтади, деб хабар беради Ўзбек телеграф агентлиги (ЎзТАГ).
Элчихона маълумотларига кўра, ушбу кечада Ўзбекистонда биринчи бор фортепианога оид замонавий америкача мусиқанинг энг яхши намуналаридан бири бўлмиш Фредерик Ржевскийнинг “Бирлашган миллат енгилмасдир” композицияси ижро этилади.
Тошкентлик ёш Артём Пак концертда Ржевский куйларидан ташқари Шуберт ва Дебюсси ёзган асарларни ҳам ижро этишни режалаштирган.
Концертга кириш бепул, аммо АҚШ элчихонасининг таклифномаси бўлиши шарт.
Эслатиб ўтамизки, Успенский номидаги мусиқа академик лицейи битирувчиси Артём Пак қатор республика ва халқаро миқёсдаги танловлар ғолиби бўлиб, Россия, Чехия Республикаси, Арманистон, Франция, Швейцария, АҚШ ва бошқа кўпгина мамлакатларда ўз маҳоратини намойиш этган.
