АҚШ Энергетика вазирлиги 2015 йилда Brent маркасидаги бир баррель нефтнинг ўртача нархини $83 даражасида бўлишини тахмин қилмоқда
Тошкент. 13 ноябр. ЎзТАГ - АҚШ Энергетика вазирлигининг Энергетик ахборот бошқармаси (EIA) 2015 йилда Brent маркасидаги бир баррель нефтнинг ўртача нархини $83,42 даражасида бўлишини тахмин қилмоқда.
Муассаса сайтида эълон қилинган прогнозларга кўра, январда кўрсатилган маркадаги нефть баҳоси баррелига $83ни ташкил қилади. Кейинчалик нефть баҳоси пасая бориб, май ойида $81га тушади. 2015 йилнинг иккинчи ярим йиллигида нефть яна қимматлай бошлайди ва декабрда унинг баҳоси баррелига $87га тенг бўлади.
Жорий йилнинг ноябр ва декабрида Энергетик ахборот бошқармаси нефть баҳосини баррелига $83 деб тахмин қилмоқда.
2014 йилда нефть нархининг тушишини EIA экспертлари жаҳон иқтисодиётининг кучсизланиши, шунингдек, Ливиянинг нефть қазиб олишга қайтиши баробарида истеъмолчилар талабининг пасайиши ҳамда АҚШда қазиб олиш ҳажмларининг ошиши билан боғламоқдалар.
