АҚШ президент Мирзиёевнинг Ўзбекистонда инсон ҳуқуқлари ҳимоясини мустаҳкамлашга содиқлигини эътироф этди
Тошкент. 4 октябр. ЎзТАГ – АҚШ президент Мирзиёевнинг Ўзбекистонда инсон ҳуқуқлари ҳимоясини мустаҳкамлашга содиқлигини эътироф этди, дейилади АҚШ элчихонасининг инсон ҳуқуқлари фаоли Аъзам Фармоновнинг озод этилишига бағишлаб тарқатилган баёнотида, деб хабар беради Ўзбек телеграф агентлиги (ЎзТАГ).
“Америка Қўшма Штатлари инсон ҳуқуқлари фаоли Аъзам Фармоновнинг озод этилишини олқишлайди. Бу янгилик Муҳаммад Бекжонов, Мурод Жўраев, Эркин Мусаев, Жамшид Каримов ва бошқа узоқ муддат қамоқда ушланган виждон тутқунлари озодликка чиқарилгани ортидан маълум бўлди.
Биз бундай ижобий қадамларни маъқуллаймиз, улар келгусида бошқа маҳбусларнинг озод этилиши ва фуқаролик жамиятига очиқроқ ёндашув учун ишора эканига умид билдирамиз”, - дейилади 2017 йил 3 октябрдаги баёнотда.
“Кўплаб халқаро инсон ҳуқуқлари гуруҳлари Аъзам Фармоновнинг 2006 йили шубҳали айбловлар билан узоқ муддат озодликдан маҳрум этилганига алоҳида аҳамият бериб келди. 2013 йили БМТ Қийноқларга қарши комиссияси ҳам Фармоновни озод этишга чақирган эди. Қўшма Штатлар Президент Мирзиёевнинг, Бирлашган Миллатлар Ташкилотида таъкидлагани каби, Ўзбекистонда инсон ҳуқуқларини ҳимоя қилишни мустаҳкамлашга содиқ эканини эътироф этади. Биз бундан кейин ҳам кенг кўламли сиёсий, ижтимоий ва инсон ҳуқуқлари борасидаги ислоҳотларда изчил барқарорлик ва тараққиёт бўлишига умид қиламиз”, - дея таъкидланади баёнотда.
