АҚШ Ўзбекистонда қишлоқ хўжалигида қадриятлар занжирини яратиш бўйича лойиҳани қўллаб қувватлайди
Тошкент. 16 сентябр. ЎзТАГ – Беш йил давомида Ўзбекистонда АҚШ халқаро тараққиёт агентлиги (USAID) кўмагида қишлоқ хўжалигида қадриятлар занжирини яратиш бўйича лойиҳаси амалга оширилади, деб хабар беради Ўзбек телеграф агентлиги (ЎзТАГ).
Куни кеча Тошкент вилоятида жойлашган Мирзаев номидаги Боғдорчилик, узумчилик ва виночилик илмий-тадқиқот институтида бўлиб ўтган лойиҳанинг очилишига бағишланган маросими бўлиб ўтди.
Унда қатнашган АҚШ элчиси Памела Спратленнинг таъкидлашича, қиймати $14 млнлик лойиҳа данакли мевалар, қовун, сабзавотлар ва узум етиштириш, уларни қайта ишлаш ҳамда сотиш бўйича барча жараёнларни яхшилашга йўналтирилган.
Қишлоқ хўжалиги соҳасида иқтисодий таҳлил ва прогнозлаштиришни ривожлантириш бошқармаси бошлиғи Муҳаммад Қосимов ўз чиқишида USAID билан аграр соҳадаги муваффақиятли ҳамкорликни айтиб ўтди. У ушбу лойиҳа мазкур йўналишдаги учинчи лойиҳа эканлигини ва бу ўзбек маҳсулотларининг халқаро бозорга чиқишига кўмаклашаётганлигини таъкидлаб ўтди.
Маросимда Қишлоқ ва сув хўжалиги вазирлиги, Ташқи ишлар вазирлиги, М.Мирзаев Боғдорчилик институти, Тошкент аграр университети, фермерлар, хусусий агробизнес компаниялари ҳамда халқаро ташкилотлар ваколатхоналаридан 50га яқин вакиллар иштирок этдилар.
АҚШ элчисининг сўзларига кўра, лойиҳа Ўзбекистоннинг 12 вилоятидаги 33 туманни қамраб олиб, қишлоқ хўжалик маҳсулотлари сифатини ошириш, ҳосилни сақлаш ва қайта ишлаш шароитларини яхшилаш, мамлакат ичида ва хорижда бозор муносабатларини, таълим муассасалари ҳамда хусусий сектор билан алоқаларни яратишга қаратилади.
Шунингдек, Л.Спратлен Қўшмам Штатлар Ўзбекистоннинг олдинлари пахта экилган 170 минг гектар ерларда турли қишлоқ хўжалик маҳсулотлари экиш бўйича ҳаракатларини қўллаб қувватлашини билдирди.
